عم تركت الشعر .. من غير سبه
وارتحت راحة .. مقنع النفس باليأس
لو إن .. "غبات البحور .. المغبه"
عندي ما تعدل رشفة الماء من الكأس
وان جت مواقفيه .. ودق المنبه
قاف ٍ على معنى / وبني ٍعلى ساس
اللي يبرّ أبوه .. "كل يحبه"
ويقدّره .. لو كان من قاصي الناس
وأبوي "بره بر" .. ما ينتشبه
بره بجدي ما لمقياسه .. قياس
اَي والله .. أحبه ، وأحبه ، وأحبه
وأغلا التراب اللي على الأرض ما داس
من أولٍ من دون الأسرار .. ضبه
كني مجند دون الأسرار .. حراس
واليوم .. فنجال ٍفالاسماع أصبه
ولا يقند غير من عنده إحساس
ماهوب رجم ٍ من يشوفه يذبه ،
ضلع ٍما يآصل قمته غير قرناس
أدرى عليه من النسيم .. ومهبه ،
لا يجرح شعوره / ولو كان نسناس
يا شين "دكتور الجراحة" .. وطبه
يوم آخذه تقول أخذ معه الانفاس
أبطى .. وأنا ما غير : أربه وأربه
فالانتظار اضرب بالأخماس الاسداس
وبعد ما قالوا "حالته مستتبه"
أنا اللي والله صدق طالع من البأس
مشعان البراق