قضى المستشار تركي آل الشيخ، رئيس الهيئة العامة للترفيه، نحو خمسة أشهر في رحلة علاجه الأخيرة، خضع خلالها لعمليات جراحية عدة، كان آخرها قبل نحو عشرة أيام، في ظل منعه من الأكل ستة أسابيع. وعلى الرغم من آلامه، إلا أن آل الشيخ يعيش وقته باستمتاع، حيث بدأ في كتابة مسلسل، ويواصل دراسة التدريب في كرة القدم. وفي ساعات الصباح الأولى، أمس، فتح آل الشيخ نافذة غرفته في الفندق الذي يسكنه في نيويورك، لكنَّ برودة الجو فاجأته، وجعلته يطلق تغريدةً على حسابه في تويتر واصفًا ما حدث، قبل أن نفاجئه، بطلب إغلاق النافذة وفتح قلبه لأسئلة حوار تويتري قصير “للسهرانين”.

01
أبو ناصر صك الشباك، وجاوب على هالأسئلة، حوار تويتري قصير للسهرانين، لأنك من زمان ما ظهرت، موافق؟
عشانك.
02
لا عدمت محبتك. أبو ناصر لو أنت أمام خيارين بس، تختار حمد الله أو جوميز لفريقك ألميريا، لا تقول طموح ألميريا أكبر، السؤال افتراضي؟
جوميز، لأنه اختياري من الأساس، وحمد الله أيضًا كبير، بس بختار جوميز.
03
زين. جرَّبت المنافسات في إسبانيا، وش الفرق بين VAR في دورينا وفي الدوري الإسباني؟
والله بتال، أخطاء التحكيم في كل مكان. السنة اللي فاتت عانيت في إسبانيا من التحكيم بوجود الـ VAR.
04
يوم صحيت من البنج، مَن أول واحد طرى عليك، لا تقول نواف أو أبو حمود، لأنهم جنبك؟
الصدق، أبو حمود، لأن عندي مكالمات، وأنا وأبو حمود ما تفارقنا من 27 سنة.
05
وش ناوي هالسنة في موسم الرياض، يقال في مفاجأة عالمية؟
فيه كل اللي بيعجبكم، ومن شهور أنا والزملاء وكل لجنة الفعاليات في اجتماعات، وأهم شي ننول رضا الله ثم مولاي وسيدي والجمهور.
06
صدق هالسنة طلبوا كم نادي مساعدة مالية وقلت ما أبي أدخل في أي منافسة محلية؟
كذا نادي، لكن قررت ما أتدخل في أي شي في الرياضة السعودية، واستأذنت الأمير عبد العزيز في ذلك. أنا من الجمهور والكرة في السعودية زعلت جمهور مني وأنا ما بي أزعل أحد، وخسرت أصدقاء بسبب التعصب الكروي، فشفت موضوع البعد أسلم.
07
طيب، مرات تطلع في تويتر وتقول أنا تعبان وتدعي، وادعوا لي، فجأةً بعد يوم تحط قصايد وتغرد بنشاط أقوى من أول، أبو ناصر يا حبيبنا ما عرفنا لك؟
بتال تبي الصدق؟
08
أكيد؟
أنا من 2016 اكتشفت كذا مشكلة صحية فيني، وأهملت، وفي 2018 سويت خمس عمليات، وحدة منها كان فيها خطأ طبي، لا زلت أعاني منه حتى الآن. أنا الآن من عشرة أيام أجريت آخر عملية، وكانت صعبة وتعبتني، والآن ممنوع من الأكل لمدة ستة أسابيع، هذا أولًا. أيضًا عندي صعوبة في النوم، وبعد فحص النوم أكتشف أني في الحقيقة ما أنام إلا دقايق في اليوم نوم عميق وباقي الوقت أفكر حتى وأنا نايم وهاذي مشكلة ثانية.
دخلت بسبب الحالة ذي بفترة نوع من الاكتئاب ما بعد العمليات وهذا طبيعي، وما أحب أتواصل مع أحد، فكنت أشغل وقتي بالفن، وبادي أكتب مسلسل تلفزيوني، وفيلم، وأكمل دراسة التدريب في كرة القدم.
أنا إنسان عفوي وهذي مشكلة بعضهم، يفسرها بجاحة، ولكن اللي على قلبي على لساني، وأمي كل يوم الله يحفظها تكلمني وتقول لا تطلع صورك، ومفسرة اللي فيني عين. ودائمًا يجيني شعور مع اللي حصل لي في الفترة الأخيرة بأن وقتي في الدنيا مو طويل، فأحاول أستمتع فيه قد مقدر، وأعمل كل اللي نفسي فيه، وهذا حقي كإنسان، وكمان جالس أعمل لآخرتي باللي يقدرني عليه ربي، فلا تلوموني ولا تقولوا وزير كيف يسوي كذا، أنا قبل ما أكون وزير أنا إنسان، أمر بمراحل صعود وهبوط، أتمنى تقدرون هذا، وأيضًا بعدي عن أهلي أنا ما شفت أهلي من خمس شهور وهذا صعب على الإنسان.
09
ألف ألف سلامة معاليك. سمو ولي العهد، حفظه الله، وسدده وجَّه في تصريحه الأخير الوزراء بأن يخرجوا للناس إعلاميًّا، ويردون على أسئلتهم، متى بتظهر؟
جاهز في أي وقت، وسيدي ولي العهد يأمر على الروح.
10
كفو دايمًا. في المنشن على حسابك فيه محبة كبيرة من الناس، وانتقادات واسعة، وشتايم، تسوي بلوك للشتامين، ومتى آخر بلوك، وليش؟
اللي ينتقدون بسبب الكورة وفترتي في الرياضة، وأيضًا بعض الجهات الخارجية المأجورة، وأنا ما أبلك إلا اللي يتدخل في حياتي الشخصية. حياتي الشخصية ملكي وحدي وأنا حر فيها. الأعراض والمحارم خط أحمر، وأعتقد أي شخص زيي.
11
أبيار آل الشيخ، متى الحلقة الأخيرة. فعلًا تقرب لك، أو حساب لا تعرف صاحبه. البعض يقول إنت تدير الحساب؟
والله هي أولًا ليست منا من آل الشيخ تميم. اسم على اسم. وفعلًا حقيقية، ولها سنة تطاردني في كل مكان. أنا اللي مستغربه وش لاقيه فيني عشان كل هالهوس؟! أنا أهلي معرف كيف مستحمليني.
12
خلاص بعد العالمية، توقف حبك عن الهلال؟
حبي للهلال لن يتوقف. اللي بيصدق يصدق، واللي مو مصدق هو حر، أنا هلالي في السعودية، وأهلي مصري في مصر، وألميريا في إسبانيا، ومانشستر يونايتد في إنجلترا، وروما في إيطاليا.
13
زين، طلعت عاشق مغرم. طيب النصراويين يقولون إن عالمية الهلال جت بفلوسك، وووو؟
جت بفلوس الدولة، ودعم سيدي محمد بن سلمان، وشغل رجال الهلال. لو كنت ساهمت في شيء فهذا واجبي، والفوز في فترة الأمير عبد العزيز وهو وجه الخير، ولا أنسى أيضًا شخص أقدره اسمه الأمير نواف بن سعد لا ننسى دوره.
14
أبو ناصر، عندك فلوس، ووزير وشاعر، وشخصية جدلية، ما شاء الله تبارك الله، الله يسعدك، وش باقي يسعدك؟
بقولك الصدق يا بتال، ولا أبي أحد يفهمني غلط، أو رياء، أنا كنت شخص بسيط وأحلامي بسيطة. يمكن بري بجدي وجدتي اللي كنت عايش معهم لين ماتوا، الله يرحمهم، ودعواتهم لي فتحت لي آفاق، وجيت عند شخصية استثنائية اسمها سيدي ومولاي محمد بن سلمان اللي تعلمت منه الكثير، واللي فتح فكري لأشياء كثيرة، وعلمني وزرع فيني حب العمل والطموح والكرم، وحب مساعدة الناس، ونصرة المظلوم، هذي كلها فيني في الأساس لكن هو عززها. بتال أنا صرت معالي وعمري 32 سنة، ولم أكن من الأسرة الحاكمة، أو أحد دعمني غير ربي، ثم ثقة سيدي محمد بن سلمان، ولد الملك العظيم مولاي الملك سلمان.
فأحاول أجتهد قد مقدر أني أرضي ربي، ومن ثم أرضيهم، وأكون قد ثقتهم فيني، وأكثر شي يسعدني ولا حد يفهمني غلط، لما أساعد إنسان، لا أذكر أن مر يوم في آخر عشر سنين في عمري ما ساعدت فيه أحد. هذا أكثر شي يسعدني. والله يسعدني بشكل ما تتصوره، لأني كنت في يوم محتاج مساعدة، وجاب الله سيدي الأمير محمد بن سلمان. حتى اللي أساؤوا لي وقفت معاهم، وكل عايلتي من آل الشيخ، أو المشرف، أو المشعان، أو العريني كل أقاربي، كل معارفي.
علمني سيدي محمد بن سلمان، وقال لي نصًّا: تركي لا يوصل لك أحد في حاجة وترده. وهذا اللي أسويه من أكثر من عشر سنين، ويدي مخرومة وفلوسي مهيب لي.
بتال أنا سويت شي وأتمنى الناس تستوعبه وتعمل زي في مثل حالتي. أنا قبل عمليتي الأخيرة قسمت ورثي وأكثر من 90% من فلوسي، وما بقى عندي لي إلا شي بسيط، وقصدي أأمن أهلي بعدي ولا يحتاجون أحد أو تصير مشاكل بينهم، والي جاب الفلوس يجيب غيرها والله يرزق، يعني أهلي الآن يقدرون ينوموني في الشارع.
15
الله يوفقك وكل رجالات الدولة لخدمة القيادة والوطن، تلقى كل هالدعم ما شاء الله، وفيه من يقول إنك أيضا تمت محاربتك، صحيح؟
كثير، لكن أقابل الإساءة بالإحسان وأكثرهم صاروا أصدقاء. وإذا ما تحاربت معناها أنت ما تشتغل ورخمة وزي قلتك.
16
نبي نروح للفن وش رأيك، تحب رابح والا راشد أكثر والا مجيد والا أصيل، ومن أحلى صوت يطربك؟
كلهم أحبهم وكل واحد له طعم وكاريزما، لكن أنا في الوقت الحالي أكثر صوت يلمسني فنيًّا من الرجال محمد عبده، ومن النساء آمال ماهر.
17
ليش آمال ماهر بالذات، وليش محمد عبده؟
كل الأصوات أحبها. أحب روح وطيبة أحلام، وأحب رجولة رابح، وأحب وفاء ماجد المهندس، وأحب أخوة راشد، وأحب جلسة أصيل، وأحب حرفنة عبد المجيد، لكن اللي يخليني في الغناء أقول آه في الرجال محمد عبده، وفي النساء آمال ماهر. أصوات من كوكب ثاني.
18
أبو ناصر، وش بيسوي حمد الله في الديربي الجاي؟
إن شاء الله ما يسوي شي.
19
أبو ناصر يا حبيبنا، طولت عليك وأنت صدرك يتسع لخربشاتي، وفضلك كبير ودايم على أخوك لا عدمتك في كل شي. شكرًا لك، ولكن نبي نختم، بقدري ومكانتي عندك المنشن فيه طلبات كثيرة لناس، اختر خمسة طلبات إنسانية وحل مشاكلهم وفق استطاعتك؟
وفقك الله، حاضر باللي أقدر عليه.
20
الله يحفظك، الأماكن كلها مشتاقة لك. صحتك الآن طيبة، غادرت المستشفى، سمح لك الأطباء بالسفر، متى الرجعة للديرة؟
أنا الآن في الأوتيل، وأنتظر أذنهم لي بركوب الطائرة. أمس تعرضت لانتكاسة خفيفة وعدت على خير. أبي أرجع للرياض، دواي الرياض وأهلها.
21
شكرًا على هاللقاء التويتري الخفيف اللطيف، تصبح على خير وفي خير أنت ومَن يقرأ؟
تصبحون على خير، وسامحوني إذا زعلت أحد أو قصرت أو نسيت أحد.