الليلة اللي خذت من صدري زرار
الصبح ما كن وده.. يعتنقها
فيها اختلط فيض دمع وغيظ من نار
قبل شفقها.. يسلمني غسقها
كان السهر ما يعرف دموع الأحرار
الين وجهي من الضيقة عتقها
وأنا ليا من بكيت.. الدمع مدرار
لو ضيقة الروح دمعي ما فهقها
إن مرت الريح بين غصون الأشجار
ما تسكت إلا بعد تاكل.. ورقها
وإلا فالأيام.. لا من طيرها طار
ماهيب غيمة لأجل يرجى ودقها
مدري وش أقول لك يا دمي الحار
ما كل قمرا تثمن.. من عشقها
ويا حادي العير مدري حادي العار
ما تخضع الروس للي ما خلقها
ونفوسنا اللي ماهيب تلوم الأقدار
لا هزوا جذوعها.. مدت عذقها
ومن المشاريه ما تطويه الأعذار
شي لحقها.. وشي ما لحقها
لا تنشد الوقت كم؟ الوقت دوار
وبيرجع الضحكة اللي قد سرقها