يا سيّد العشق طالت غيبتك والهمّ طاويني
طيّة رشا بير نجّع بدوٍ اتورّد ظواميها
يا وجد روحي على لاماك لو ماعاد يمديني
لو فرصتي معك تشرى يا نحيل العود لـ أشريها
اطيوف حُبّك معي دايم مثل ظلّي يباريني
يا بري حالي وياعزّي من الفرقا وطاريها
ويا فوح صدري على قرْبك ويا منوة نظر عيني
أجوع لك وأشتهي وصلك على الدنيا وما فيها
العام كانت عيونك ديرتي وأغلى عناويني
واليوم ما عاد بعيوني دموع افراق وأبكيها
ياقو قلبك على الصدّه وأنا يا قسوة سنيني
محروم من جنّتك والنار تصلاني وآصاليها
اضلوعي العوج كانت لك مثل خضر البساتيني
لا عاد تشرهْ على نار الجفيّا يوم تشويها
الحال ينقص شوي شوي واللّي صار يكفيني
الله يخليك وأهل العذل ربي لا يخلّيها
وقع المفارق على صدري مثل وقع البراكيني
الهجر يذوي عروقي كلّها والوصل يحييها
طالبك طلبه تلحّق ما بقابي لا تخلّيني
الرجِل في دربٍ ايجيبك لها! حفْيت سباريها
يا مهرةٍ من مرابط خيل متعبة السلاطيني
صفراً تلاعب رسنها والحلا والملح كاسيها
حمام واديك يوم أمرّْ عصريّه يلاحيني
الظاهر اللّي وطاني من ثلاث شهور واطيها