يا فلذّة كبدي المتفرّدة بين الصبايا
وش يقول الشاعر اللي عينك أوسع من خياله؟
شاعر يكتب بسلاسة متناهية.. ويعبر عن ذاته بأسلوب مميز.. جمال بندر خصَّ “الرياضية” بهذا النص.

استهل الليل والعشّاق طرحٍ فالزوايا
كل واحد يذرف دموعه وبلشانٍ بحاله
ومرّني طاري فقيدة قلبي وسقت التحايا
وتم ترتيب القصيد وجاري إرسال الرسالة
كيف تنسيني وأنا مخلص غلا وأبيض نوايا؟
وكيف تجفيني وأنا كنت أحسب الهجر استحالة
لو تجوبين الديار ولو تعشقين البرايا
عاشقك والله ما تلقين رجّالٍ بداله
لو يوزّع لأكثر العربان ما به من مزايا
قلّوا عفون الرجال وكثروا رجال الشكالة
خلّي اللي واصلٍ قمّة جبال الهاملايا
والله إن اللي وصل للقمّة العليا.. عقاله
المسافة بين نظرة عينك وبين المنايا
مثلها مثل المسافة بينه وبين الجمالة
يا فلذّة كبدي المتفرّدة بين الصبايا
وش يقول الشاعر اللي عينك أوسع من خيالة؟
الحقيقة ودي تشوفين وجهك فالمرايا
يمكن أنك تعذرين اللي عجز يوصف جماله
في ثغرك الأحمر من الشهد ما يملى خلايا
وفي جمالك شي سحر الطبيعة في صلالة
وين بتروحين من قلبي ومن عوج الحنايا؟
اعتبر بُعدك عن دياري “هروب من العداله”
ما نبي منك مديح ولا نبي منك هدايا
قولي أحبّك وصلى الله على محمد وآله