المتفائل: آه لو بس الحكم صفّر قبل الكورنر كان الآن منتخبنا في نص الطريق لجنوب إفريقيا. المتشائم: لا تقول لو الحكم صفّر، قول لو الله هدى لاعبينا وهدّوا وقتلوا اللعب بدل الفلسفة، وبعدين أحسن إننا طلعنا من البحرين ولا رحنا وأتصفقنا من نيوزيلاندا على هذا المستوى. المتفائل: ترى التأهل عن طريق الملحق عادي، شوف منتخبات أفضل بكثير من منتخبنا ممكن يدخلوا ملحق مثل فرنسا والبرتغال ويمكن الأرجنتين. المتشائم: مقارنة ما لأمها داعي، قدم مستوى وطلع لاعبين مثل هذه المنتخبات ولا تروح كأس العالم ولا غيره. المتفائل: ترى بس اللاعبين والله ما قصروا في المباراتين الذهاب والإياب وبذلوا مجهود طيب. المتشائم: والله المدرب بيجيه أمراض الدنيا والآخرة من لاعبينكم، دقيقة وحدة ما قدروا يحافظوا على هدف، وتقلي ما قصروا، فين خبرة النهائيات. المتفائل: والله أنا شايف إنه مدرب جيد وسوّا نقلة فنية جيدة في مستوى المنتخب. المتشائم: يا رجل شكله رايح رايح، الكتّاب في الجرايد والمحللين في القنوات التلفزيونية استلموه، ليش ما ضم اللاعب الفلاني، وليش ضم اللاعب فلان وهو عنده ثلاثة لاعبين في نفس المركز. المتفائل: هم الكتاب والمحللين ايش يبغوا أكثر، الرجال ضم لهم كل اللاعبين إلا اقترحوهم. المتشائم: لا والآن النقاد والكتاب طالعين لك بشي جديد، ليش يلعّب اللاعب الفلاني في مركز ما هو مركزه، وطريقة اللعب بمدري كم محور ما تناسب لاعبينا وأسلوب لعبنا. أقول والله لو تجيب مين يدرب المنتخب في الآخر بيطلعوه ما يفهم. المتفائل: والله... والله ما قدرت استوعب إلى الآن إنه ما أتأهلنا لكأس العالم للمرة الخامسة على التوالي. المتشائم: أقول تصدق ولا ما تصدق راحت علينا خلاص وبعدين البحرين يستاهلوا لعبوا وما يأسوا لآخر ثانية في المباراة. المتفائل: المباراة عموماً كانت متكافئة بس ترى هم أتفوقوا علينا لأن صار عندهم خبرة في مباريات الملحق. المتشائم: صار الملحق كمان يحتاج له خبرة، باقي تقول أن الصوم والرطوبة في مباراة الذهاب وحر الرياض في الإياب كان لها تأثير سلبي على لاعبينا لوحدهم. المتفائل: طيب ايش الحل عندك أنا مازلت مصدوم وأحاول أدور أي سبب يقنعني بخروج المنتخب. المتشائم: أقول لا تكبر الموضوع ووسع صدرك، بكرة يبدأ الدوري ويحمى الوطيس وترجع التصريحات النارية بين الأندية والمسئولين والإعلاميين واللاعبين، وترجع الديربيات والكلاسكوهات بين الأندية. صدقني بس يبدأ دوري المحترفين بننسى كل شيء عن المنتخب وبنلتفت لمشاكل الحكام وقرارات لجنة الاحتراف والانضباط وأزمات الأندية المالية في شراء عقود لاعبين جدد، وعاد شوف كم حكم ولاعب يتوقف وكم مدرب ولاعب أجنبي يتلغي عقده. المتفائل: أجل متى بيستأنف دوري المحترفين وبين مين ومين أول مباراة!؟.
