يانور الصباح افهق جديل المساء بيديك
سرى ليلي أرقب جيتك وألتفت يمك
أنا يالسهر ماعاد أبيك ولا أبي طاريك
ليا صار وضعي ما يهمك وش يهمك
يا "نوم الهنا" سيّر علي ودي أعشيك
أنا طالبك "قل تم" جعل الله يتمك
متى بسمع عيوني تقول "الله يحييك"
ومتى أهدابي تقلطك وجفوني تضمك
ياصدري خذتك الضيقه إيجار بالتمليك
من الراحه اللي قبلها كانت تعمك
لو أشيل ضلع النير من نجد لـ المكسيك
أببطي عظم ما شلت همك ولا غمك
أحس الظروف تقول: والله لـ أوريك
وأحس الصبر يقول: شمر لها كمك
تضيق الدروب ولا تحصل من يراعيك
ليا قامت الدنيا تشتتك وتلمك
وأبو جعلني مـ أعدمك وجعلني مـ أبكيك
يجوز انه اللي لاقضى المصلحة ذمك
تخيب الظنون أحيان فـ اللي تعده شيك
ويظهر لك من الناس أخٍ لم تلده أمك
يهون القصور إن جاك من شخص مايعنيك
ويكبر عليك إن جاك من لحمك ودمك
مصيبة ليا من ابن عمك تردا فيك
ونصيت البعيد وقام معك وجلا همك
لا قال أبشر أبشر والله ان كنه يعزيك
على موتت عروق الحميّا في ابن عمك
هذي والله اللي لا تميتك ولا تحييك
ساعتها تحس الموت يخطيك ويخمك
ماتشره على اللي عنده دواك ويخليك
تشرِّه على اللي عنده دواك ويسمك
حزمي سعد