إذا صليت العشاء لا تروح أي مكان . أحسن شي (تكي) في البيت عشان ما تفوتك (فله) البرامج الرياضية وخصوصا يوم الجمعة إذا صرت شاعرا من هم الدوام وبديت تردد (يضيق صدري لا طروا ليلة السبت .. ليت الليالي كل أبوها ربوعي)
الزبده لا تفكر تنام وأنا أظمن لك (الوناسه) إذا دارت الكاميرا على الضيوف وسكتت إللي جنبك عشان تسمع الجواهر .
وفر الزعل وأمسك الريموت لحد يغير وما له داعي تتضايق من أولها إذا سمعت واحد يحشر الشباب بالقوة وبدون جماهير مع الكبار لأن الثقل ورا . ولا تنفخ على العيال إذا شفت ثاني حاط رجله وداعس عشان يريح الرائد في الخامس جماهيريا لأنك لو ركبت مع السالفة بتشوف الاتفاق في المراية مبنشر وسط عجة الدهناء وبدون إستبنه . وقتها ما تقدر تشره على السواق إنه ما فزع ولا تلوم الاتفاقيين إن كفراتهم (تيوب لس) مو (صحافة لس)
المهم صحتك بالدنيا يعني إذا ارتفع ضغطك (روق) وأطلب أم العيال شاهي لأن ليل البرامج بأوله .
ويا ليت تتفرج ساكت ولا تسوي فيها فاهم وتتمنى تغيير الضيوف لأنه بالعربي (صبه .. حقنه .. لبن) يعني على قول (فيصل الغامدي) الشارع ولد عم الرصيف .
عشان أعطيك الهرجة من الآخر ركز ولا يهمك إن الفرق (إثنعشر) لأن الأستوديو لثلاثة أندية (سبعة) ثابتين والباقين بالقرعة أو أقرب واحد يجي عشان (التذاكر) . مثلك عارف (حركات) عن قولة مو محايدين وقول خير لا يشرطوا هز الروس و (الشور شورك يا يبه) وإلا الباب يوسع جمل .
الكامل وجه الله وخلنا منصفين هو صحيح إن الضيوف عشره وإللي يسولفون إثنين
لكن بصراحة مشددين على التجاوزات . وأعتقد وصلك إللي سووه في زميلهم إللي قال (ضفادع) . الله لا يوريك أجبروه يعتذر للنادي وكانت بتوصل للفصل لولا ستر الله . ما طول عليك تحقيقات ومشاكل ولجان وكل هذا وانا أعيط على قول عادل إمام .
ما علينا من إللي راح ولا يهمك كلامي إذا مو مقتنع بس لا تنشب لي بكرة وتقول إني سهرتك . وإذا تبغي نصيحتي قول للحرمة تسكر على طلب القهوة عشان تقدر تنام لأنه وراك زحمة طريق ودوام بكره ولا أوصيك إختار الجرايد والقنوات الرياضية المضبوطة عشان ما تجيك (إنفلونزا البعارين)