ماخذيت القصيد مزوح ولا تسلي
كل ما مال ظله واينعت لي عذوقه
يوم طال الوقوف، وسال فـ الأرض ظلّي
زان حبكة قوافيه، وزانت طروقه
يا حبيبي رفيقك جابني من محلّي
وانت نوٍّ من البارح تكاشف بروقه
تاخذ الريح من بالي كلام، وتخلّي
كلمةٍ وقّعت فـ القلب، وادمت عروقه
رمح صوتك تنصّاني، وانا جيت كلّي
وأنفرى الصدر فريٍ ما تخيّط فتوقه
ماني بــ قادر انسى كلمة احبك اللّي
قلتها ليلة الفرقا بنبرة صدوقه
شالّي يرضيك.. واسويه بس انت قلّي
واسرق الكحل من عين الحياة السروقه
إعرف إن كل شي يجوزلك.. جايزٍ لي
كان ما ارضاك همّي حط لي همّ فوقه