بيتنا اللي في حكم خالد جديد
مادريت ان له عمر ياخذ منه
طاح سقفه وانكشف فرش الحديد
يوم شفته غّرد الورق لحنه!
والله اني بعيد عن جو القصيد
مير بعد اليوم ماعّني.. وعنه

من ينسيني طواري صبح عيد
يوم كان العيد يجلس له سنه
بيتنا بيت القريب امع البعيد
ماعلى بابه جرس تستاذنه
داخله بيت الشعر ضد الجليد
فـ ايسره سقيا ومصلخ فايمنه
السعاده فيه ماتنقص تزيد
الغريب يزود عمره فوطنه
حتى جار البيت كان اسمه سعيد
وش يقول اللي سعيد ويسكنه
بيت شايب ماهو بطارف سديد
يحصد لسانه حصاد الألسنه
عنده المحتاج مفتوح الرصيد
لين شاف المستحيله ممكنه
البدن مهدود والموقف عنيد
ياقف عناده على صح بدنه
عبدالله حنيف