كائن حي
غنّي على شان الكلام يصير له عطر وعيون
وأصيبي شعور الفتور العاطفي في مقتله
صوتك يحاصر أمنياتي بالندى والزيزفون
وسوالفك نفحة شذى بالذاكرة مستلله
الشعر كائن حي وأجنحته من أنغام اللحون
والأغنية وقت الشتا تتحول لقرنفله
الناس جوعا عاطفة والصمت شباك الظنون
الكلمة الحلوة بوجه الصبح حبة سنبله
يا أقرب أحلامي فديتك ما تصنعت الجنون
هذا فرح لقياك ودا ضيقتي للمقصله
شعرك حكاية ثورة العالم على عهد الشجون
اليا انتثر يشبه طموحات السنين المقبله
كان الربيع العاطفي طيب ولو ما هو حنون
كانت هتافاته بعبرات السنين مبلله
وانتي صدحتي للملا نموت لا يمكن نهون
والله ماكني بريئة بس كني مذهله
وأحاول القى عذر لاخطائي وأعوّد لك بدون
بدون أيّا شي لكن في فؤادي أسئلة
عن ضحتك وشلون تطرد بؤس حالي في غضون
وضمة أمل تطلق جمل أربع سنين مكبله
الصبح مع صوتك أرق ياليت قومي يدركون
ان أجمل أنواع الكلام اللي بليّا تكمله
غني واذا قيل الغنام أحد علامات المجون
قولي لهم إن الشتا أغوى شعور مدلله
