السحر واقف على أطراف الشبابيك وغرفها
تطرق أنفاسه تبشر بالفجر والليل ساهي
ساعة للروح تتجلّى عن الدنيا وصلفها
تغتسل فيها عن جنون وملذات وملاهي
لهفة للنفس تهدا عن خطاها وعن سرفها
لو زرعت بصبحها ذنب نبت في قلب لاهي
عادة الإنسان فطرة من عرف ربي عرفها
قد غلطاتي أتوب، وغلطتي ترجع تجاهي
فاقد الرغبة ورا ظهر الحياة ألمح ترفها
فوق خيط من الأمل يمشي لو إن الخيط واهي
أفرد ايدني وأمد لخطوتي عين تخطفها
من شعور التيه لو في التيه شي من التباهي
أرضي أيامي عشان أحيا ولا أحسب وش كلفها
عيشة بين الغني والفقر يرضيها التماهي
آخذ أحلامي على بساط الخيال أغوي شغفها
لو بساطتها تواسيني بنسمة صبح زاهي
كم ورا شفاهي تثور حروف عادت من طرفها
صوتي الخوّاف يا ما كان يتحامي بشفاهي
من متاهات الوعي أرجع وأنا كاره قرفها
كل حاجة تحتمل معنى، ومعنى عكس ماهي
يا إلهي وأنت تدري عن صفا نفسي وشفها
وينما تسرف بها الدهشة تنادي يا إلهي
شدني عن كل ما يسرق من دروبي صدفها
ودي أحيا بعد لحظة غفلتي قبل انتباهي
والله إني ما رجيت من الحياة ومن خلفها
غير دعوة من نجاة وضحكة وبراد شاهي