أحبك يجي عقب البطا وقعها كنّه:
صدى أول "يبه" لمعالج العقم من عقدين
خصوصية اللهجة، والإدغام بالغنة
لاجا حرف ساكن في كلامك بعد تنوين
أضيع الضياع اللي مابي رجعتي منّه
لاخذني كلامك من عيونك لـمدري وين!
من أول لقا قايل لك: أبوك للجنة
ما تشرين قلبٍ ضامه الشوق من "تشرين"؟
على كثر ما قلبي من العالم أحنّه
معك كن ما هو قلبي وكن لك قلبين
يا غصنٍ نسانيس الهبايب يهزّنه
به من الثمر تفاحٍ أحمر، وتوت، وتين
لارفتي فبعد الله لك الفضل والمنة
ولامنّك قسيتي قلبك بكيفك تمونين
أشوف التغلي ماهو بزين لكنه:
لامنّك تغلّيتي يصير التغلّي زين
أبطرد مقفّي دام ظني على ظنه
وأنا ماني أوّل عاشقٍ يطرد مقفّين
وابخلق لك الأعذار وأقول: يمكنّه
ويمكنّه، ويمكنّه.. أعذار لين تجين!
ياجيتي بوجهٍ ما لأحد صدةٍ عنّه
يارحتي وأنا أرقب من هنا لين يوم الدين