اسهري بين المشاعر وارقدي بفوادي
واعشقيني عشق ابوك لا بسمتك.. يا بسمه
في حور عينك مراسي رحلتي لبلادي
يافديت عيونك البكايه.. المبتسمه
ويا فديتك ياهدية عيدي وميلادي
طلت كنها من خيوط الشفق.. منقسمه
ينجبر في جيتك خاطر كسره عنادي
وينقسم في صدتك رجال.. قسمه.. قسمه
شاعر يطرب من ابداعه لا ضاق... الشادي
وكل بيت من بيوته.. ينعرف من وسمه
علميني لاحداني شوقي المتمادي
وجهها رسمه.. مثل روعة جسدها رسمه
كنها نبتت خزاما في فياض الوادي
فوقها ديمه وينعشها هبوب النسمه
ويش أسوي لا حداني للمفارق.. حادي
في نهار قدر الدمعه.. وأهان البسمه
ويش أقول ان المفارق صعب ولا عادي ؟
يقنع الرجال ياخذ في حياته قسمه!