كفاية يا مسباح القصايد والاستمتاع
على جال ديجورٍ يلوعه سكونه لوع
بحر صمت واستدراك وعي وشعر وإبداع
عسى ما تودينا لدرب الظما والجوع
ومن شرهة الهقوة ومن غربة الأطباع
ومن السايد العفوي ليا رغبة الممنوع
كلاك الخلا يا قلبٍ أبيض بدون قناع
وظنونً تحشْد جموع مدري تفض جْموع
ما عديت في راس الجبل لجل احفْر القاع
يا عشّاقة المرئي وعشّاقة المسموع
بعد راح من عمر القصايد ثلاث أرباع
أنا أحتاج ينبت لي ما بين الضلوع ضلوع
تضاريس الأرض اللي على متنها الذعذاع
مسافاتها تنقش بجوف النفوس طْبوع
وملامح مشاريه النوايا بدون إقناع
حماقاتها لا هي قضية ولا مشروع
تقولون كيف يصير.. شوف الصدور وساع!
وشوف الحيا متبوع.. أقول الحيا متبوع
أنا أعرف بطون شباع لكن حلوق جياع
ومتونً تشيل بشوت منها الحيا منزوع
ما يمدي الخيانة فالمفاهيم صف أتباع
لو السيف فـأرقاب العدى والعلم مرفوع
بواكير الأفكار العظيمة ضحايا أوجاع
على مسرح استعراض من كل شكل ونوع
ولو أنك سليط لسان ولا طويل ذراع
الأيام ما تكسر ظهرها بحب الكوع
ليا أقفى طموحك فوق سرج الظروف وضاع
ما تدري تهل بيوت ولا تهل دموع