كــل ما يفرد جناح الليل في عيني حضوره
يمتلي صدري حنين وتعقد الوحشة لساني
وكل حال وكل بال وكل صوت وكل صورة
أمرها عند السنين اللي لها جّل امتناني
وكل من يحمل وزر غيره ويصغر مع غروره
لا يبروز صورته للجدي وسهيل اليماني
علمَوني كيف أشيل الضر عن متن الضرورة
وعلمَوني كيف احضَن الريح قبل اسرج حصاني
لين بانت في عيون السجة النفس الجسورة
وكيف أشيل من الدروب دروب وأنا في مكاني
والرفيق اللي يسامر وحدتي ويشب نوره
يشرب إحساسي على هونه ويكبح عنفواني
آه كم شيدت من صم الصفا بيته وسوره
إن خذاني ما خذيته وإن عطيته ما عطاني
وكم كسرت العذر لو النفس ولَها ومَعذوره
مع نسيم الفجر والترتيل بالسبع المثاني
السماء ينفض سحابه والغصن طارت طيوره
والحسافة ما تقصّرها مسافات الأماني
لو تحس أنك ضحية حزن ما تعرف شعوره
حاول أنك تفهم اللي يقلقك بإحساس ثاني
ماني بخايف من التأثير لو يصير ثورة
خايف أطلع من حياة الزهد بالوجه الأناني