أنهك الليل نوحك يا حمام العسيب
غاديً له ورى قيعان صدري صدى
احسب أن المشاعر تحت عذقك تطيب
لين غنى حزين البال ما له جدى
كل منا نقل حزنه وجرحه صويب
بين هم الشعور وبين فكره غدى
يطرق السمع صوت ويسهج البال غيب
لا غسل وجه صبح الليل قطر الندى
شيبتنا الليالي مير عيت تشيب
ضاع جهدي على وقفات غيري سدى
ليت ما لي من جروح الأوادم نصيب
ذيك طعنة خوي وذيك ضحكة عدى
مثل ما الشمس تغمس نورها فـ المغيب
حادي الصمت في نجم السكوت اقتدى
وايق الفجر في قلبً يدور ذهيب
قام يندب على ذكراه قبل يحدى
كلما حط رجله في طريق ً يخيب
ضاق صدره ولو ما ضاق فيه المدى
وان تجاهل وقوفه ابن عم و غريب
صد في هقوته من طيب ما هو ردى
عادة الذيب لا ضاقت يجي له قنيب
وفي سنا كل عليا جر صوت و بدا
ما حسب للأوادم من بعيد وقريب
علق الروح دايم خلف نور الهُدى
جيت مثل السحايب ما عليها رقيب
لي هزيم ً على جرد الفيافي شدى
ومن لمح في ضلوعي جرح قلبً عطيب
جعل قلبي لـ عين اللي بكاني فدى