أنا كتبت الشعر من دافع هواي
وشعري رفيع وقدري ووزني رفيع
مع أن مالي عالم تطرد وراي
ولا شفت لي تصوير وفلاش ولميع
لكن عزاي أن اللي يصور معاي
الكاميرات اللي على الخط السريع
صورة وأنا رايح وصورة وآنا جاي
الظاهر أنها تدري أن شعري بديع
الوقت صاير يشبه محمد كلاي
أركى عليّ ألين خلاني صريع
معاد فيني شي يضحك من عناي
ألا عقالي بس يضحك للجميع
اللي تغداني بعد ماكل عشاي
وخلا صداقتنا وخوتنا تضيع
نشر علومي وأكثر علوم أخوياي
وده يحفظ السر ولا يستطيع
عمومًا أعرف وينه ورقمه معاي
كان العربية تبي واحد مذيع