أنت علقتني معها وعذري سمين
بس وحشة غيابك وشهي أعذارها

عطا الله ممدوح، الشاعر السعودي، ينثر حروفه في قصيدة عذبة خص بها «الرياضية»، يصف من خلالها صورة محبوبته العالقة في خياله ويشتكي غيابها.

صورتك في خيالي ثابتة من سنين
بس غيبتك عني هزت جدارها
كانت مبروزة باللهفة وباليقين
لين ما الفقد صار يهشّم إطارها
أنت علقتني معها وعذري سمين
بس وحشة غيابك وشهي أعذارها
كل يوم أرقب رجوعك وأعوّد حزين
أي “ذكرى” تمر أمشي على آثارها
لين ما أوقف على جرف الأسى والأنين
كل “شرفة أمل” مسدولٍ ستارها
يا كثر ما أنتظرت بسكة العابرين
أحطب الذكريات وتشتعل نارها
في ضلوعي وأنا اللي للطواري رهين
كيف تختارني لو مابي أختارها
آه من طيفك اللي كل ليله يبين
ما أذكر أنه غفت عيني ولا زارها
بين سجن الظروف وبين سجن الحنين
ليت سود الليالي تكشف خمارها