إن بلانا الله بها ما يصح الا الصحيح
تبشر بروسٍ كبيره تزيل عماسها
شاعر يكتب بطريقة محترفة وجزلة وخصَّ “الرياضية” بهذا النص
القدر مكتوب والصبر في مده شحيح
دورة الأيام تمضي وتطوي ناسها
ليتني لاضقت! صدري بسدي مايبيح
واكتم أحزان المعاليق جوف اقواسها
وليت ما لي باب هم يجيني منه ريح
كل ما اقفل باب بقعا تدق اجراسها
ضايق بعيني فضا نجد لو إنّه فسيح
من ثلاث أيام ما هب لي نسناسها
علموا نوّارة القلب والوجه المليح
جعلني فدوة كدرها وجرح احساسها
الدموع اللي من عيونها النجّل تميح
ما تليق بسلهمتها وسحْر نعاسها
الجريح يزيد شرّه ليا شاف الجريح
كن روحي لا بكت تستضيق انفاسها
ودي اخذ من تعبها تعبها واستريح
ما بقالي شمس عقب اسدلت خرماسها
الله اللي راد لو كنت ابا اوقّف واطيح
المنيّه من يناطح براسه راسها
إن بلانا الله بها ما يصح الا الصحيح
تبشر بروسٍ كبيره تزيل عماسها
علمتني رحلة العمر واليوم القبيح
كيف أقاوم ضيق نفسي وأقوّي باسها
أول الرحله مهد وآخر الرحلة ضريح
والحظيط اللي لا شاف المصيبة داسها