يامحط النظر لاكثروا الناظرين
سالفة خاطري وياك ياطولها
سلّط الله على المتكبّر.. المستهين
مثل ماسلّط شفاهك على لولها
خشّةٍ ودّك إنك تخشّها باليمين
وتحرم الناس طلّتها ومعسولها
في عزا صمتك الدنيا طواها الحنين
وإن نويت الكلام يعيش مقتولها
‏يفتح القلب لك بابه على مصرعين
وتغلق النفس عاذلها ومرسولها
سولف بسالفة أو جملة أو كلمتين
أي حاجة تحب تقولها .. قولها
شاعرك من تعدّا عمره الأربعين
مامعه في مشاكلها ولا حلولها
حط فالرّف سادات وشعوب وسنين
والمحابيل عاقدها ومفتولها