يا قلبي لاخلقت الراي من ضلع المكابر.. تاه
بـ ليلٍ ماتقدي به مشاعل فكري.. اقدامي
بـ صوت العقل: خذ رايٍ صقل بالتجربه معناه
وترفّق بالمشاعر لين أداوي جرحها الدامي
ليا حثيتها فـ اعلم ترى السلوان، دون حماه
بحر شوق ومفازاتً بها قيض الجفا حامي
وعلى صهوة جموح العزّه اللي لـ الندم ملفاه
حمل قلبي معه ذنب الغياب وراح متعامي
بيومٍ بشت ليله ضفّ صبحه في ذرى ظلماه
ونهاره شامةٍ في غرة الماضي من ايامي
وعلى درب الحنين اللي معه كل السنين اشباه
احذف امسي وراي وكل يوم القاه قدامي
صحاري تيه ياعمر الفراق اللي جهلت اقصاه
ورى رمضا جفافك همت وتظللني اوهامي
توكيت الصبر واليا عطشت اضرب به المضماه
ولاهش التعب عني ولا اسقى عزمي الظامي
أدور فيك لـ لنسيان دربٍ لا بغيت ألقاه
تهب الذكريات اللي تهيج شوقي الطامي
وعظيم الشوق لامن هاج بالقلب البصير اعماه
يخليه بغموضٍ باربع الافآق مترامي