نص خاص
نوير
مانتي أول من مشى درب الفراق ولا الأخيرة
عشت جرحك وافهمه وشلون قاسي يانوير!
شاعرة عذبة تكتب بحرفنة مختلفة تستنطق الأفكار وتجعلها تشع إحساسًا، خصَّت “الرياضية” بهذا النص
القصيد يغيب لين الليل يرسل لي نذيرة!
وصوتك الباكي نذير الليل يا الظبي المذير
العرب خلت غراب البّين يفرح في مطيِرة
ومن يشوف عيونك السود يتغرب ويتطير!
شاحبه ماكنك أجمل بنت في شبه الجزيرة
وانتي اللي في كنفها لذة العمر القصيّر!
ليه دقيتي علي بـ نبرة اللي مستجيرة؟
”يا غرام مجيرين الغير، منوة كل خيّر”
قلت لك من قبل ليتك في كلامي مستخيرة
من ثمان سنين وانتي في وهمك، ولا تغيّر
من تغير غيرك انتي؟ ذابلة طرف وكسيرة!
ضحكتك تبكي عليك ونظرة عيونك تحيّر
أدري مالك أي ذنب وصدمتك بعده كبيرة
امسحي دمعك ترا الأقدار ما فيها مخير!
مانتي أول من مشى درب الفراق ولا الأخيرة
عشت جرحك وافهمه وشلون قاسي يانوير!
من فقدته كن مال الحب والأحباب سيرة
وكن مال الشمس نور وكن ما فـ الأرض ديّر!
شفته الرجّال بين أطفال يوم أني صغيرة!
وصار رجال، وما زال فـ عيني الطفل الصغيّر
قال أببعد قلت طيّب؟ قال آسف قلت غيره؟
قال بكره؟ قلت بكره وإن غلبك الشوق سيّر
قلبي بـ ديره وقلبه راح يا نوير بـ ديرة!
مرحلة قاسيتها من “عزّ نفس وفكر نيّر”
ماهقيت إن المفارق فيه شر وفيه خيرة
لين مريته بـ ضحكٍ يكسر الضلع القصيّر!
