مرت عليك شهور يالقلب الكتوم
يهزّك النسناس مدري وش يبي
قل ما تبي ما يلحقك فـالقول لوم
ولا تفكّر في ذكي ولا غبي
يا قلبي اللي خابرك دايم تشوم
ما هو سببك اللي جرى لك بسببي
إن طحت يا قلبي عن العذال قوم
وإن قمت لا ترجع على الأرض تحبي
نقطة وبعد النقطة القصة عموم
بقولها: صلّوا على وجه النبي

قلبي تعلق في عنود وبنت قوم
نجديةٍ مثل الظبي وأحلى ظبي
فيها الشموخ اللي يوديها الغيوم
وفيها التواضع مع كبير ومع صبي
عزيزةٍ ما هيب تخفاها العلوم
ومعربّة ما هيب من عرق أجنبي
شمسٍ ليا غابت عن الأنظار يوم
لي حق أعاتبها وأكثّر فـ عتبي
إلا عتاب البارح البارح سهوم
مضرابها من منكبي لـ منكبي
لو أنها في وسط نجد أرض القروم
وأنا هنا في “فيرمونت” أبو ظبي
أثر العتاب أحيان ما يقضي لزوم
لا والله إلا كل الأحيان.. يهبي