أنا طيّب ومتعافي قبل تسأل عن الأحوال
بسولف لك وأنا داري تهمّك آخر أخباري
لقيت اللي ينسيني غيابك.. يا خليّ البال
تخيّل ذكرياتك في وجوده.. مالها طاري!
نفض عن قلبي غبارك وضحكّني على الأطلال
محى صورتك من عيني وشال اسمك من أفكاري
سقى روحي بعد قسوة جفافك، عطفه الهمّال
شفى جرحك على يده، وأخذ من غيبتك ثأري
مثل ما كنت تخطي وأقبل أعذارك قبل تنقال
يسامح كل غلطاتي.. قبل لا يسمع أعذاري
فدا وصله جفاك الممتلئ فقد وتعب وإهمال
بداية فجره الغايم.. نهاية ليلك الساري!
غرامه دار وبلاد.. وغرامك غربة وترحال
وصلت الموطن الآمن بعد ما طالت أسفاري
قضى عمري ومشواري معك بين الغرق والجال
معه تو العمر يبدأ.. معه يا حلو مشواري