ياحزن لو تكّيت كوعك بمركاي
ماني بقايل روح.. لو راح عمري
عدي الدهمشي.. هذا النص إحساس يترجم شعورًا مختلفًا بطريقة مختلفة..
الحزن خيّم تالي الليل بحماي
دقّ الوتد واطناب بيته بصدري
مالي رجا ياكود ربي وملجاي
حبل الوصل وياه مايوم يفري
خابت ظنوني بالبشر.. خاب رجواي
انذبحت الهقوى على أعتاب صبري
ياحزن لو تكّيت كوعك بمركاي
ماني بقايل روح.. لو راح عمري
لانّي لقيتك رجل بايع وشراي
تبيع همك للبشر.. كيف؟ مدري؟
لكن ست شهور شايفك وياي
ماترتجي مالي ولا تريد شكري
أسامرك بالليل واشربك بالشاي
وتبهّر دلالي مع الصبح بدري
الصمت خيّم بآخر الهرج بحماي
فضّ الكلام ومابقى غير شعري