طوّل الصبر وعيوني ملاها السهاد
وإن تلفتّ للقمرا عوا ذيبها
ودي أسج وأنزل من جبل في حماد
زال الأيام صافيتن مشاريبها
كفكف الصيف جنحانه وهب البراد
والخوي جدد العزبة وترتيبها
الشتاء فيه للسجه مساحه وماد
سجة النفس فيه أجمل عذاريبها
الليالي طويلة والسوالف جداد
ياحلاة اللحون اللي نغني بها
سالي البال لا تنشد عن الاقتصاد
انبسط والليالي ما انكشف غيبها
عن زحام المدينة دوّر الابتعاد
لاتضيّق على روحك هناديبها
شب نارك وجمرك لايعود رماد
وإنّ غشاك الظلام ألحق مشاهيبها
سلوة الروح تشرى بالذهب والعتاد
كان تقدر عليها جيبها جيبها