أخذ من عمري وعطها ولا ني بالعمر معذور
ببر اللي لها عمري عساها.. دوم مسروره
خالد الزيادي.. شاعر سعودي يقدم نصًا جديدًا يترجم شعورًا مختلفًا..
على حزن السنين اللي تولاني بدون قصور
أخذ من فرحتي شيء كثير.. وزاد في جوره
وأنا مالي سوى ربٍ كريم وفي رجاه النور
يحقق ما طلب عبده ما دام الروح مأمورة
ألوذ برحمتك وبقوتك دام السنين.. تدور
تكافيني من أحزان الزمان.. وكامل شروره
دعيتك تشفي المرضى وترحم خاطرٍ مكسور
وترأف حالة العبد الضعيف.. بجور دكتوره
أخذ من عمري وعطها ولا ني بالعمر معذور
ببر اللي لها عمري عساها.. دوم مسروره
غلاها عندي لحاله ولا ني بالحكي مجبور
يا أجمل من سكن بين الضلوع واسمها نوره
يا كل أشيائي الحلوة يا وردٍ بالعمر منثور
يا أول من بدى عمري على شوفته وحضوره
وأنا والله ما قلت القصيد وفِي رجا جمهور
أقوله لا حصل شيء كبير وجاله.. ضروره
ولا همي ليا قالوا هذا شاعر وفيه.. غرور
كلام الناس ما أثر.. عساها دوم مقهوره
نصيحة فالعمر يا اللي تبي الجنة وشوف الحور
تبر بوالديك إن كان تبغى الروح.. مسروره