غن يوم أومت لك الريح يا طير الحمام
سمّع اللي سالي البال واللي ما درى
سلّم الفضة مهرها ليا حار الكلام
وعلّم عيونك سهرها ليا طار الكرى
ما على مثلك ليا صحت بالعالي ملام
وأنت تحت أغلى ثريا وفوق أطهر ثرى
يا وطن سلواك خيبة ونكرانك حرام
نفحتك من ريح طيبة وعطر أم القرى
لك مقامٍ كل ما شع قلنا يا سلام
تعرفه كبرى القضايا ويذكره الورى
غنتك كل الحمامات يا داعي السلام
والتجا بحماك غصنٍ لقى فيك الذرا
وكان دقّت طبلة الحرب ما غيرك حسام
رفرفت رايات نصرك على كل الذُرى
يفتخر غيرك بتاريخ عام وكم عام
وأنت ما قبلك بدا شي من ليلة حراء
يوم خيلك تدحر الجهل وتبيد الظلام
لين طالت رقعة النور وعيونك ترى
كلنا من دون حدك على خط الأمام
حنا أصلا من عرفناك ما عشنا ورا