ومري على قصايدي مثل البخور
لين أتنفس شعر ما هو بأكسجين

محسن بن تركي.. شاعر سعودي يقدم نصًا جديدًا يترجم مشاعره..
يا فاتنة.. والليل شكاك وغيور
لا تخدعك قمراه.. قمراه الكمين
لا يخلق الدهشة على وجه الصبور
ولا يرسم البسمة على وجه الحزين
تعالي وكلّ الظلام يصير نور
ومن وين ما تمشين ينبت ياسمين
أنتِ ربيع إحساسي اللي كان بور
ما باقي إلا تمطرين.. وتزهرين!
تبختري بين التواضع والغرور
وخذي من أبيات الغزل ما تشتهين
ومري على قصايدي مثل البخور
لين أتنفس شعر ما هو بأكسجين
الحب إذا ما هو بلك ما هو شعور
والشعر إذا ما هو بلك ما هو بزين
والشعر أنا وعيونك النجل الحضور
وكل ما بغيت أبدا عجزت أبدا منين
كل الكلام.. اللي على بالي يدور
يضيع في نظرة وفي غمازتين
واللي خلق هالوجه هالوجه معذور
لو يلتفت للفاتنات.. بنص عين
كل الجمال اللي ما هو بأنتِ عبور
والوجهة أنتِ، والحقيقة، واليقين