يا خوي الدرب واليمه على مسرى الركايب
وأنت والله ما تخيب هقوة اللي فيك هاقي
جوّد حزام الأمان وجود حزام الصعايب
وانشد ولا تنشد إلا عن حنيني واشتياقي
ودي أسج الفياض اللي توطتها السحايب
من حدود عمان لبوابة الحد العراقي
ساق ربي في سماها سربةٍ مثل الكتايب
مدلهماتٍ تصب الماء مثل صب السواقي
لين صارت جنةٍ خضرا تلاعبها الهبايب
قاعها ظلٍ ظليل وجوها هادي وراقي
الفجوج الخالية من عشقها ماني بتايب
والعمر ما غير سجة يوم وسنينه طراقي
ليت عندي قلب طفل وليت عندي عقل شايب
كان ما عنيت مع درب المحبة عظم ساقي
دايم أنسام الشتاء ترجع بذكرى كل غايب
والغلا بين الحنايا العوج باقي له بواقي
سامح الله جفوة الأيام وجروح الحبايب
ليت لحظات المفارق مثل لحظات التلاقي