ويا فوح صدري على قرْبك ويا منوة نظر عيني
أجوع لك وأشتهي وصلك على الدنيا وما فيها

عبد الله بن مرهب.. يقدم نصًا جديدًا مميزًا

يا سيّد العشق طالت غيبتك والهمّ طاويني
طيّات بيرٍ عليها بدوٍ اتورّد ظواميها
يا وجد روحي على لاماك لو ما عاد يمديني
لو فرصتي معك تشرى يا نحيل العود لأشريها
طيوف حُبّك معي دايم مثل ظلّي يباريني
يا بري حالي ويا عزّي من الفرقا وطاريها
ويا فوح صدري على قرْبك ويا منوة نظر عيني
أجوع لك وأشتهي وصلك على الدنيا وما فيها
العام كانت عيونك ديرتي وأغلى عناويني
واليوم ما عاد بعيوني دموع فراق وأبكيها
يا قو قلبك على الصدّة وأنا يا قسوة سنيني
محروم من جنّتك والنار تصلاني وأصاليها
ضلوعي العوج كانت لك مثل خضر البساتيني
لا عاد تشره على نار الجفيّا يوم تشويها
الحال ينقص شوي شوي واللّي صار يكفيني
الله يخليك وأهل العذل ربي لايخلّيها
وقع المفارق على صدري مثل وقع البراكيني
الهجر يذوي عروقي كلّها والوصل يحييها
طالبك طلبه تلحّق ما بقابي لا تخلّيني
الرجِل في دربٍ يجيبك لها حفْيت سباريها
يا مهرةٍ من مرابط خيل متعبة السلاطيني
صفرًا تلاعب رسنها والحلا والملح كاسيها
حمام واديك يوم أمرّْ عصريّه يلاحيني
الظاهر اللّي وطاني من ثلاث شهور واطيها