لا جيتها هلت دموعي وأنا جاي
أجل لا جيت أروح وشني بسوي

عبد الهادي أبوديه.. يقدم نصًا جديدًا مميزًا

ضيقة ضميري دونها بسمة شفاي
أنا رهين أمرين حزن وتقوّي
من صمتي الذبّاح يحييني حكاي
ولا يميت ازعاجي إلا هدوّي
أنا بساطي رجم والنجم مركاي
سود الليالي ماتطمّن علوّي
من داء وجد الروح وجداني دواي
لا راود القلب الشعور المغوّي
الاعتدال وحكمة العقل مبداي
إلا المحبة زاد فيها غلوّي
الجادل اللي حركتني من أقصاي
قمت أتخيلها من الشوق توي
لا بطيت من شوف أجمل أحلام دنياي
كني ورا الأضلاع شبيت ضوي
وإن شفتها يطفي زعل قلبي رضاي
وأرحّب بصوت الحنين المدوّي
يعزف ضلوعي حبها عزفة الناي
وألعب من الطربة وقلبي منوّي
أول نفس لي فالهوى وآخر مناي
عيني لا شافت زينها زان جوي
إذا أشغلت فكري ما عاد أحكم الرأي
وما عاد أميز صاحبي من عدوي
لوصالها مشاعري تسبق خطاي
عجل بشعوري ما أستطيع التروّي
لا جيتها هلت دموعي وأنا جاي
أجل لا جيت أروح وشني بسوي
من عين نفسي طحت.. والسبة بكاي
دمعي ثقيل وما هقيته يهوّي