العين ما تكذب ليى صرت كذاب
واللي بقلبك ترجمتها عيونك
ياتيك من بين الرفاقة والأقراب
حمّال سيفن يغرسه في متونك
كنه خفيرن جالسن لك على باب
شكله يحرسك والمهمة يخونك
يا كم ما سامحت واخذ بالأسباب
وأغض طرفي واتحمل طعونك
كله على شان العهد بين الأصحاب
والقاك مبسوطٍ تمارس فنونك
ضيعت وقتٍ ما حسبنا له حساب
مع مكرك اللي صدرتها عفونك
كبرت قدرك عند ربعي والأجناب
وأثرك وضيع وأسود الوجه لونك
واليوم وزنك عندنا حفنة تراب
عفنا مداراتك وعفنا جنونك
يجيك من مثلك خبيثٍ له أنياب
يحط نابه في حشايا ردونك