أنقذوني يالمطاليق من ليل الذهول
وضيقة ٍ لا عسعس الليل ماعنها وقا
مامعي صبر المهادي ولا حلم الرسول
غير قلبٍ حطه الحزن نقطة ملتقى
من سلم من جور الأيام لايقعد يقول
الهقاوي مضمحله... والأيام محقا
عزتي للي يدور على أنصاف الحلول
كم نزل من راس رجم ٍ طويل وكم رقا
ياعيون الشمت غظّي عن عيون الملول
واعذري من طاح دمعه على عز ونقا
ماتطيح دموع الأحباب من باب الفضول
ماتطيح إلا من فراق ولّا من لقى
زابنك بطعون الأيام يالظبي الجفول
لا تخلّي حاجز البعد يهدم ما بقى
(تدري إني بين الأصحاب وخفاف العقول
أتضاهر بالسعاده وأنا كلّي شقى)
لا سقى الله قبل حولين مدري قبل حول
يوم خليت القطاعه على وضح النقاء
جيت لك مثل العصامي على ظهر الذلول
ورحت مثل اللي يدوّر عن العالم تقا
الهوا بحرن شواطيه وأمواجه تهول
والقلوب الخضر في جاله أسرا وعتقا
يابعد من راح عمره مراويح الفصول
لا تقول الواقع مهيب وشلون نهقى
(إن عطتنا بيض الأيام بنقول ونطول)
وإن خذتنا سود الأيام لله البقاء