ما ينزل دمعة الرجال فوق جفونه
الجفاء والا القسا والزود والنقصاني
وما نقض جرحٍ دفين وما بحث مكنونه
غير سوء الظن والزله من الخلاني
إن تكلم ما نفع والصمت زاد جنونه
والغلا ترجح بوزنه كفّة الميزاني
علّة الرجال في جوفه وكثر طعونه
لا ضرب درب السفر.. وأغلى البشر زعلاني
يا وجودي يوم هز العود ليّن غصونه
انثنى غصنه وعرقه فالثراء رياني
وجد.. من طبق عليه الكونغرس.. قانونه
متهم في سجن واشنطن بذنب الجاني
سيرة الأيام والدنيا ما هي مأمونة
علموا خلي لا ينسى رحمة الرحماني
ياطروش تاصلونه.. تقدرون تجونه
علموه إن العذر ما يقنع الدياني
وعلموه إني بدونه ويش أنا من دونه
ما لحد منّا غناةً من وجود الثاني
وعلموه إني على خبره وطيب ظنونه
أذكره ما أنساه لو إنّه نوى ينساني
وعلموه إني على شانه ولجل عيونه
متعب حالي وأنا اللي ما انقضى لي شأني
وعلموه إن المشاعر للغلا مرهونة
يعلم الله ما حوى صدري وفي وجداني
وعلموه إن الغلا حاميه كبر حصونه
ثابت سوره وبنيانه على برهاني
وعلموه إن القراح اللي تغيّر لونه
خالطه بعض الهماج وعافه العطشاني
لا يتمادى في جفاه ونفسي المفتونه
في هواه ومن جفاه يزيد هم أحزاني