الله على المطلاع مع طلعة سهيل
ونفضة هموم الراس في راس قمه
ندوّر السجات وندوّر السيل
لا لاح برق المزنة المدلهمه
الضلع يوم يعانقه غيمٍ مهيل
تقول شيخٍ فوق راسه معمه!!
من كثر ما يمطر على القاع ويسيل
كن البحر ينسف على القاع يمه
يضرب نحاه الجيب ويحط ويشيل
ما فار ماي أديتره فار دمه
شد الوكالة فزته لا أونس الويل
فزة سنافيٍ فزع لابن عمه
يمسح قزازه والسحايب هماليل
كنّه يمسّح دمعه براس كمّه
جوٍ عليل تزين فيه التعاليل
حتى العليل يطيب ويزول همه
قال الزمان يبيّد الحيل بالحيل
قلت اسمع: وواردك على متمه
الوقت ما يضعف عزوم الرياجيل
اللي لهم مع قوة الهم همة!!