ألا يا شبيه اللي يبا عالي المشراف
ندر في تواصيفه وفي صنفه ونوعه
مسمينه أهل الطير من سطوته خطاف
على كثر ما يسطي على الصيد ويلوعه
ما تفرق عنه واجد سوا برمية الأهداف
لو إنك خذيت أجمل خصايله وطبوعه
يا غاية هنوفٍ كل ليلة تغني قاف
رغم حبكة القيفان ما هيب مسموعة
تشوف الهوى محلل إذا وافق الأعراف!
مثل ما تشوف إن لهفة الشوق مشروعة
حداها شعورٍ لا يوصف و لا ينشاف
وهي لا طرى لك طاري تصك موضوعه
هذي حالتي من شحنة الخاطر الميلاف
تمر الهموم أحلاف والضيق مجموعة
أبي جبّرة الواقع لو إن السنين عجاف
على ملة اللي مخرج العبد من روعه !
بعد ما سلم من سطوة السيف والسياف
و ذاق الفرج من همٍ، مهشم، ضلوعه
لو إني من سلوم البدو ما لقيت إنصاف
ويا كم عاشقٍ قبلي ماحد قدر دموعه
ما يرضيني إلا مسلك الرسل والأسلاف
لو إن الظروف تصرم القلب وتزوعه