آخر الليل
ياتالي الليل.. حط الجرح عندي وروح
ما للكرا؟ لذّة.. ولا فالمحاجر؟ منام
إستاحش الضحك من كف الزمان الشحوح
ثم غادر الوجنتين اللي كساها الظلام
أقاوم الهمّ وأجمع في رفات الطموح
وإليا تمثنيت ثلث الليل صار احتدام
ليه آخر الليل دايم مرتبط بالجروح؟
اللي تضيّق فضى.. واللي تسيّل غمام
أحيان ودك تبوح.. ولا أنت قادر تبوح
تخاف.. من نظرةً مابه بعدها كلام
حرب الشعور الحلو ضد الضمير اللحوح
يمكن يسبب لمن يشعر به الانفصام
ياوجه الأيام خلّك من جهتنا.. سموح
واجبك منا ،، نسلّم وأنت رد السلام
يغني غموض النوايا عن جمال الوضوح
يمكن وضوح القلوب يقلل الاحترام
لو بعض الأوقات تاخذ من سحابتك ضوح
لا تعطي الضوح من قلب الليال اهتمام
ثم تنصدم فالبروق اللي سناها يلوح
ماهي تغذّي غصون .. ولا تركّد عسام
أشوف بعض الحروف أصلا عبقها يفوح
والوضع واضح معي .. ماهو على مايرام
الظاهر إن الحشا مما جرا له .. يفوح
الله يستر لا يدخل فالضلوع .. انقسام
خلوني أسلى وأوادع ضيقتي ثم تروح
وأرد نفسي عن اللي يعكسون النظام
ياتالي الليل عطني مابقى من جروح
واترك تفاصيل يومك تنتهي في سلام
