أشغل البال ليلٍ مكتسيه العَتام
وامتلى بالشعور اللي عجزت أسترَه
كيف أبي أنزع عباة الخوف عنّي وأنام
كيف ما أسهر وأنا ألمّ العشَم وأنثره
فاقدٍ شخص لو يكثر عليه الملام
ما كسر من غصون الظن غير اخضره
كان الأحلام والماء والهوا والسلام
لين ما اجتزّني فاسه وأنا أتشجّره
كان كل الوجود اللي في عين العدام
كان كل الخطاء اللي ما قدرت أغفره
يلمس البال لمسه للجروح القدام
وأتلمس في صدري ضحكته.. وأعذره
كيف بمحيه من صوتي.. وهوّ الكلام
كيف ابنْزعْه من جوفي.. وأنا أتعثَّره
علّق النور في آخر حدود الظلام
ولا ترك من حنين الليل غير أقشره
صد عني وأنا مدري وش الانهزام
وانتهينا وأنا ما كنت أبي أخسره
ليت الأحلام ماتت في كفوف المرام
و لا أثقلت متني بمشروه ما يقدره
وليت الأيام في وداعه عزيزة مقام
ما استغلت عمى قلبي قبل تكسره