ياللي سهرك البرد واشعلك الحنين
‏ايديك ترجف شوق وعيونك حمر
‏عامين طايش فجأة آشوفك حزين
‏نصيحتي خلك بطيشك مستمر
‏تخيل ان المر كان البُعد لين
‏كرامتي صارت تشوف الوصل أمر
‏كنت بحياتي نبض قلب وشوف عين
‏كنت السما كنت المسا كنت القمر
‏شف وين كنت أول وصرت اليوم وين
‏من يزرع غيابه جنى الفرقا ثمر
‏وانا بعد ما كنت لشعوري سجين
‏سجنته وخليت شعري له ممر
‏اذا ظهر يشفي غليل المخلصين
‏اللي هواهم لأصدق الحب يعمر
‏رح في أمان الخوف.. والله المعين
‏نيّات قلبي بيض وطعونك سمر
‏الحاضر البيّن سبب ماضي دفين
‏على الرماد انفخ وبتشوف الجمر
‏مانيب متقبلك لو عذرك سمين
‏الصبر مات وشوق منتظرك ضمر
‏الفرق واضح بين الاثمن والثمين
‏العمر فرصة وانت فرصة بالعمر