جيت وجبينك نور .. ورموشك رماح
ترميبها .. وأنا على قد حالي
فاللحظة اللي عطرك اللندني فاح
ضاعت ملامح قوتي ... واحتمالي
كأنك بحر صبري لغبتك سباح
وكأنك قمر .. جفني صديق الليالي
خطة غرام الحب مسرا ومسراح
ودموع وشموع وقصايد .. وغالي
في واقعي ماني مرتب ومرتاح
أحب أعيش الشاعر اللا مبالي!!
استانس بقربك وتبرابي جراح
يا مضمّدٍ كل الجروح التوالي
أنا آدمي من عيني الشوق ماطاح
أصلا يبين اللي يدور بخيالي
مكشوف ولا أحيان سارق ومزاح
مغرور يوم أشوف محدٍ بدالي
كنت أتعنّى .. كل مابارقٍ لاح
مليت حتى من صعود المعالي
"أفكر بمستقبلي" .. هم وانزاح
من كم سنة ما فيه حاجة فبالي
حسّبتها لقيت نص العمر راح
وفجأة بعد .. لقيت نفسي لحالي
من ناحية مرتاح .. ماني بمرتاح
ألا ليا شفتك تسولف قبالي