لا تبكّيني .. ترى دمعي قريب ..
ولا تخلّيني .. ترى ماني قوي !
والله انك جيت في دربي حبيب ..
ومن بَعَدك أهيم ما عندي خوي !
انت حزنك منْه قلبي مستصيب ..
خلّ حزنك يلوي ضلوعي لوي !
هات حزنك بس تكفى لا تغيب ..
وانبسط مدام قلبي مهتوي !
ينتظر والجرح في نبضه عطيب ..
مستوي وأحيان ماهو مستوي !
كن صوته فـ الحنايا صوت ذيب ..
بـ اسمك وذكراك لا غبت يْعوي !
والله اني ما تعوّدت النحيب ..
مير حبك كاويٍ قلبي كوي !
كنت قبلك اطوي الجو الرحيب ..
ومن بعدك الجو فوقي منطوي !
جيت قَسْم وصار غيري لك نصيب ..
وكنت حلم وصار حلمي مْنتوي !
آه من فرقاك يالغصن الرطيب ..
لا ذكرتك وانت مايل مرتوي !
والله إن الحب والحظ الكئيب ..
تقتل الأحلام في قلب بدوي !
ارجع لـ غاليك يا أغلى حبيب ..
رتّبه .. تراه بَعدك فوضوي . !!