صاحبي غن واسرج صهوة المفردات
في لحونك صهيل وفي عيونك يقين
لا أنكرتك الوجيه وغادرتك الجهات
لا تسلّم زهابك في يدين السنين
ازرع مْن الظروف محاولة وأمنيات
مثل ما يزرعون البسمة الطيبين
و روحك اليا كلت من نبتها الذكريات
اسقها من هوابيل البدو جرتين
خلك من السكات اللي بليا سكات
واغنم الفرصة اللي تغري المبدعين
لا يغيظك ملام وزحمة ومغريات
تقدر توّقف العالم على كلمتين
خوفك اللي تخافه .. خله أول ثبات
مثل ما يثبتون جدودك الأولين
في وجيه الخطوب و قسوة المعضلات
يبرز اللي يسار ويبرز اللي يمين
احتزم بالطموح لثورة المقبلات
لا تعوّد من الآمال صفر اليدين
لا تضحّي بوعيك في رضا التضحيات
وأنت دمعتْك ما تذرف لها كل عين
اعرف ان  البلاء  امْحّص  السيئات
كان  تدرك  بلاء  ورفعة  المؤمنين