الأمر الله.. ياوداع المحبين
ياللي جرحت القلب والقلب مجروح
غافلتني على عجل يوم الإثنين
مثل السروق اللي لقي الباب مفتوح
تهون عندي سكرة الموت ذالحين
ومواجه اللي خطه الله على اللوح
ولا غياب اللي بياخذ نهارين
ولا يعود إلا بعد طلعة الروح
ياليتني عانيت منه الأمرين
ولا ذقت منه مقصر العمر والشوح
الحزن ذاك الأول الأمحق الشين
اللي يجي مع غيبة الشمس ويروح
تعلمت منه الحنين البعارين
وتعودت منه الحمامه على النوح
ماخاشرك في العين ياقرة العين
إلا دموع سترها منك مفضوح
يوم أن ماها عذب وقنادها زين
خليتها تركد على النار وتفوح
ماني موفرها لبكره وبعدين
متى ماحدتني على البوح بـأبوح