الله يعينك على الناس يالقلب الحنون
استغلوا طيبتك وأنت في طبعك ملول
يجرحونك من غباهم أجل مايعرفون
أن ربي خالقك للهوى العذري رسول
جعلهم يفدون من ضمتك تحت الجفون
مهرة من نسل (شقران) والأم (الجفول)
أستشفت طهر الأحساس من غر المزون
واسقتك عذب المشاعر بعد صابك ذبول
قررت تملك كياني وأنا قررت أكون:
عاشق لانيب صاحي، ولانيب مهبول
تعرف الحب الحقيقي هو الحب الجنون
حب يخلق لك مشاكل ويخلق لك حلول
انثرتني وجمعتني تحت (سحر العيون)
والعيون الله خلقها مفاتيح القفول
ليلة حاولت أبين غلاها قلت: أمون ؟
قالت: أيه وقلت: أحبك وقالت وش تقول
قلت: والله لغدقك بالقصايد واللحون
الين أخلي كل نفس يراودها الفضول
قالت: الشعَار لأقوالهم مايفعلون
قلت: أنا شاعر لكني لما أقوله فعول
فحضنتني لين شميت (عطر الزيزفون)
ياحلو بعض الجراءة من الشخص الخجول
صارت عيوني على الورد والدر المصون
ودي أطوله ولكن يديني ماتطول
ياقمر، يانجم مهما حصل لا تشهدون
أتركونا في دقايق نعيش أربع فصول
القلوب تعيش بـ الحب والدنيا بدون
حب .. ما فيها سعادة ولا فيها قبول