يا راسي المعصوب أنا طالبك فالليل العتيم
لا تستميل الا على راس إمي وسجادتي
ولا تخاف إن خفت من محيي العظام وهي رميم
عساه يرفع في سهم برّي وسهم عبادتي
وبعض المواضيع الجدل فيها أشوف أنه عقيم
وما أحب فيها أساهم بنقدي ولا بإشادتي
دون الوطن مواطن في ثوب شيطان رجيم
أقولها و أنا بكامل قوتي .. و .. إرادتي
عزايم الريجيل ما تنباع فأسواق العثيم
وصل عوداتك السلام الحار من عوادتي
لي كم سنه من الهروج الواجد مسوي رجيم
لو العلوم علوم مجبور أحتفظ بإفادتي
ياليت لي قدره على إستيعادة الوضع القديم
يوم العلاقه طيبه .. بيني وبين وسادتي
بيني وبين النوم ما بين النديم مع النديم
عرفني وعرفته أول يوم من ولادتي
وكنت أتوقى به من الذكرى ليا هب النسيم
وحاسب حساب الواقع اليا شن حرب إبادتي
قمت أحسد اللي يرقدون إستغفر الله العظيم
راح الحسد عاده وهو ماهوب والله عادتي