على سنا البارق الساري لقيت الكلام
وجلست الملم شتات اللي بقا من حنين
أخطف به الغيم وأكسر به جناح الظلام
وأخذ معه سجة الداله وحرص الفطين
إنسان مثلي مثل غيري وعندي مهام
وأطيح وأقوم لا مره ولا مرتين
أشبع طموحي من الهمه ومن الاهتمام
وأرسم على وجهي البسمه لو اني حزين
على كثر مانجحت اخاف من الانهزام
وحتى لو افشل بعض الأحيان عندي يقين
ان الفشل يتبعه ردة فعل وانتقام
اما استغليتها والا وطتك السنين
الحلم لاطاح طاح ولا استقام استقام
ويحتاج له صمله ووقفه وضلع متين
تنسيك طعم التعب نشوة بلوغ المرام
وتكفيك شر المصايب دعوة المسلمين
امارة السوء ماتعرف حلال وحرام
وعنانها في يدينك في كلا الحالتين
مادام صفحات عمرك تنطوي عام عام
العذر لا تامنه حتى لو انه سمين
المجتهد عطر ثيابه بمسك الختام
والغافل ارخص ثمن وقته ووقته ثمين
الناس للناس والدنيا محطة سلام
سابق على الأوله واطلق سراح السجين
اليوم قررت أصافح بالغمام الغمام
وان قاله الله قراري في قرارٍ مكين
اتعب عليها والحفها المحبه وانام
واعيدها لين خلتني من العايدين