من شقوق الحنين ودورِ امست خراب
دوّر النور في صدري على مهربه
ليل وإحساس ما بين الزعل والعتاب
وأكثر إحساس ينبش في الصدور أغربه
يا حبيبة عيوني طال ليل الغياب
والصباحات ما ظني على مقربة
افتحي لي دريشة وصل ما اقول باب
وقولي الله عطاك النور هاك اسر به
وجهك اللي تماها بين شمس وسحاب
وشعرك اللي مسيل الشمس في مغربه
وان تثنت على اللحن القديم الثياب
جنّوا الطار والمزمار والمطربة
والله انك سراب وعارف انك سراب
ووالله اني لا اصبه في يدي واشربه
جيت ما كن مرتني سنين الشباب
وكن مالي حبايب قبلك وتجربة