عليك اتكالي يـا الله العفـو والغفـران
تفـرج لقلبـي سبـة الهـم والضيقـة
حمدتك على ما أنزلت من نعمة النسيان
وأنا عبدك اللي خايـف ذنوبـه تعيقـه
حصل ما حصل للعبد قد قالهـا سلطـان
وأنا اللي حصل من صاحبي شي ما أطيقه
لو أني مسامح وأتحمل بعـض الأحيـان
وأطوّف خطا الصاحب ولا أحـب تدقيقـه
ما أحب الخطا الجارح ولا الذل والحقران
وأنا شاربٍ من دلة العـز وإبريقـه
هبوب الندا هزت بقلبي غصيـن البـان
عسى خير يا حلـمٍ تمنيـت تحقيقـه
لكن الزمن سكّر علـى دربـه البيبـان
وأنا ما لي إلا أرضى بعـذره وتصديقـه
هجرني وأنا توي صغيرٍ على الأحزان
وتوكل وأنا أدعي له مـن الله توفيقـه
رحل والله أنه ما درى عن غلاه إنسـان
ولا يمكـن الأيـام تكشـف مواثيـقـه
رحل ما ذخر عن وجهي إلا الدموع ألوان
وأنا ناشفٍ ريقي وهو ناشفٍ ريقه